2Th 2 | GbrGAW | STEP

2 Thessalonians 2

Yesu Jeze Be Lo.

1 – 2 Nsaiye, Eyi Dagayi Yesu Kristi ɓeɓe njesun, n yi yezhi yi n wo aba ma? Mi gyifye wye, agu to vin fyen, omi azaje, shi fye wo ai ce akata nge Dagayi nyipyei la lu ɓen. Nfya wo aza ɓai gna ge, ɓa gye ruya, kwo ge Shekwoyiwa tnu ɓa tnu-tnu, kwo wasika n fye zhin nubwo ge kwo gmi n mi aba, fye to ga gaiciyan. 3 Fye to ye zaho-zahoi wa dna fye kwoce kwo fyewyin. Gama nyipyei ta ɓen sai anya ngun aba nku zhin, kmisunyi esa n aza ɓei na Shekwoyi aɓo, n sayi oza kala kpeyi anapi ɓi wo ɓei ɓe. 4 Wo ɓei tu Shekwoyi cegye n nya doho-dohoi n na gakwo mwa-mwa, Wo ɓei lo wo sase tu n Shekwoyi nyakun ngye Shekwoyi, woi cige wo zhin Shekwoyi nu. 5 Fye to ye palo nge mi ɓei ku ce gna fye, esa n mi ɓei kunsun n fyei nyin? 6 Fye kpe enya ye lo n kwo ye n woi shi, to woi ɓe yan, wo ɓa bwa ɓe owo sai lasi nu.

7 Tnu-tnu n oza kala kpei n anapi nyayi ɓei zhin, esa n wa ɓe, kwo gyi abye lo n saiye, ama owo nwohin tukwo ta ɓen, sai oza n wo hana n woi nyi wola laka. 8 Nsai oza nukwoyi ye ɓei ɓe, oza n Dagayi Yesu ɓei bmiwo na n wo gbe osun yi, woi wu wo, esa n wa jeze ɓe n cei. 9 Benukwoyi zhin-hi ye, wo ɓei ɓe ngye Shetan a tnu-tnu kaya, n nunuyi n Shetan ikoyi, woi dna aza kwoce n na aɓe wo-woyi n wo ɓei zhin. 10 Wo ɓei dna aza kwoce kpekpe n ɓa lo anapi nyi–gama ɓala gaiciya aɓo na, ɓato ye kwo, ɓa gakwo gaiciya, n na bai kwa gni ɓam. 11 Ntucenu Shekwoyi ɓei fa ɓa, ɓa ga akata gaiciya n ɓa bugbayi vinya. 12 Aɓei da ɓa owa dei-dei shi ɓa ga akata gaiciya, ɓai na gaiciya aɓo, ɓai gyi abye fi n ɓa a laifi. 13 Ama tilas ya zhin Shekwoyi godiya cici ntu fye ɓo, eyi aza je n Dagayi ye fye nyi, gama Shekwoyi a ɓei kni fye tunyi n sapa, wa ga fye gni-gni, woi zhan fye ya n Zafun Gyi-gyi-yi ntu fye kpema ɓo n gaiciya. 14 Wo ɓei zhin apma n yi, wa gna fye Nabari manayi. Wa yi fye fya ɓe fya bwa mwa-mwa eyi Dagayi Yesu Kristi nya.

15 Nna aɓeye vinyai fi n bugba, omi azaje, fye ku mi zhi fya ku gaiciya shi dei-dei, n yi ɓei wu fye nyi n doyi n yi ɓei ka fi fye n wasika nyi.

16 Eyi Dagayi Yesu Kristi n wohin tukwo n Shekwoyi eyi Dada, n wa ye yi wa gayi atnazhin nyalo-nyalo nya n na awyetu yi n yi to kunce ya bwan. 17 Wo zhin fye bugba a tna, n na atnazhinyi vinya, wa bma fye zhin n ɓo manayi vinya, n fye ɓa zhin fyei da.